പത്ത് ഫ്ലക്സ് അടിക്കണം. അതിനു ഒരു പതിനായിരം. ആള്‍ ഒന്നുക്ക് അഞ്ഞൂറ് രൂപയും പൈന്റും ബിരിയാണിയും, അങ്ങനെ ഒരു അമ്പതു പേര്‍ . അപ്പോള്‍ ഒരു മുപ്പതിനായിരം. കോഴിക്കോട്, തിരുവനന്തപുരം തുടങ്ങിയ സ്ഥലങ്ങളിലെ മുന്തിയ പ്രസ്‌ ക്ലബുകളില്‍ പത്രസമ്മേളനം നടത്തണം. അതിനു വേണ്ടി രണ്ടായിരം രൂപ വീതം (മൊത്തം നാലായിരം) . റിയാലിറ്റി ഷോയില്‍ ഇടുന്ന തരം വേഷം .ഇടത്തരം കോസ്ട്ട്യുമിനു തന്നെ രണ്ടായിരമെങ്കിലും വേണം. പിന്നെ കുറച്ചു നോട്ടീസ്, ലഞ്ച്, ഡിന്നര്‍, വണ്ടി, മൈക്ക് സെറ്റ്, പെട്രോള്‍, എസി, പത്രക്കാര്‍ക്കുള്ള ഞം ഞം ..... എല്ലാം കൂടി മറ്റൊരു ഇരുപത്തിഅയ്യായിരം.. മൊത്തം ഏകദേശം ഒരു ഒന്നൊന്നര ലക്ഷം ഉണ്ടാക്കിയിട്ട് വേണം മാനാഞ്ചിറ മൈതാനിയില്‍ അഴിമതിക്കെതിരെ സമരം തുടങ്ങാന്‍.
നാട്ടിലെ ജീവിതചിലവ് കുത്തനെ ഉയരുകയും കേരളത്തില്‍ തേങ്ങയെക്കള്‍ കൂടുതല്‍ എന്ജിനിയര്‍മാര്‍ ഉണ്ടാവുകയും ചെയ്യുന്ന അവസ്ഥയില്‍ ഇനി റിട്ടയേഡ് ഗള്‍ഫുകാരനായി തിരികെ ചെന്നാല്‍ വേറെ ഒരു പണി കിട്ടില്ല എന്ന് ഏതാണ്ട് ഉറപ്പാണ് . അതുകൊണ്ട് ഇത്തരം സ്വയം തൊഴില്‍ കണ്ടെത്തുന്നതിനു ഒരു ലോണ്‍ എടുക്കുന്നതിനെകുറിച്ച് കാര്യമായി ചിന്തിച്ചു തുടങ്ങിയിരിക്കുന്നു നോം . ഇന്ത്യയിലെ അഴിമതി തുടച്ചുമാറ്റിയാല്‍ പിന്നെ പാകിസ്ഥാന്‍ ബംഗ്ലാദേശ്, ബറുണ്ടി, സോമാലിയ തുടങ്ങിയ രാജ്യങ്ങളിലേക്കും ഈ സമരം വ്യാപിപ്പിക്കാം. വിവര സാങ്കേതിക വിദ്യ പനപോലെ വളര്‍ന്നത്‌ കൊണ്ട് ഇപ്പോള്‍ സമരം നടത്താന്‍ പഴയപോലെ മൈദ മാവ് ചേര്‍ത്ത് പോസ്റര്‍ ഒട്ടിക്കുക, രാത്രി ഉറക്കം ഒഴിച്ച് ചുമരില്‍ കുമ്മായം കൊണ്ട് എഴുതുക, മൈക്കില്‍ അങ്ങാടി മൊത്തം വിറപ്പിച്ചു കൊണ്ട് അന്നൌന്‍സ്മെന്‍റ് നടത്തുക തുടങ്ങിയ ഔട്ട്‌ ഡേറ്റഡ പരിപാടികള്‍ ഒന്നും വേണ്ട. ചുമ്മാ ഒരു ഫേസ്ബുക്ക് പേജ് തുറന്നു ഇന്ന് നിരാഹാരം, നാളെ വഴിതടയല്‍ അങ്ങനെ ആഹ്വാനം ചെയ്‌താല്‍ മതി .
താഴെ പറയുന്ന കാര്യങ്ങളില്‍ ചിലത് മുദ്രാവാക്യങ്ങള്‍ ആയി ഉന്നയിച്ചാല്‍ സമരം അല്പം സീരിയസ് ആണെന്ന് മാലോകര്‍ ധരിച്ചോളും.മാത്രവുമല്ല വലിയ ജനപിന്തുണയും കിട്ടും.
- ഒരു രൂപ മുതല്‍ ആയിരം രൂപ വരെ ഉള്ള നോട്ടുകള്‍ നിരോധിക്കണം എന്നിട്ട് ബാര്‍ട്ടര്‍ സമ്പ്രദായം വഴി ആട്, കോഴി എന്നിവ പണത്തിനു തുല്യമായി പ്രഖ്യാപിക്കണം.
- കീടനാശിനി, വളം, വിത്ത് എന്നിവ നിരോധിച്ചു വയലുകളില്‍ നാനോ കാര്‍ കൃഷി ചെയ്യണം.നാനോ നന്നായി വിളഞ്ഞാല്‍ പിന്നെ ബി എം ടബ്യു തുടങ്ങിയ സാധാരണകാരന്റെ വാഹങ്ങളിലേക്ക് കൃഷി വ്യാപിപ്പിക്കാം.
- ഗ്രാമീണ ബാങ്കുകള്‍, കനറ ബാങ്കുകള്‍ എന്നിവിടങ്ങളില്‍ വന്‍ തോതില്‍ പണം കുന്നു കൂട്ടിയ ഞാന്‍ ഒഴികെ ഉള്ള ആളുകളുടെ സ്വത്തു പിടിച്ചെടുത്ത് ചവറുകൂട്ടി കത്തിച്ചു കളയണം.
- വിദേശ ബാങ്കുകളിലെ ബ്ലാക്ക് നിക്ഷേപം പ്രോത്സാഹിപ്പിക്കാന്‍ സഞ്ചിക പോലെ ബ്ലാക്കൈക നിക്ഷേപം നടപ്പിലാക്കണം. മാത്രമല്ല നിക്ഷേപക സൌകര്യാര്‍ത്ഥം സ്വിസ്റ്സാര്‍ലങ്ടിലേക്ക് എയര്‍ ഇന്ത്യ കുറഞ്ഞ ചിലവില്‍ വിമാന സൌകര്യം ഏര്‍പ്പെടുത്തണം.
- ഉടായിപ്പ് സന്യാസം പ്രോത്സാഹിപ്പിക്കാന്‍ അക്കാദമി, ഐ പി എല്‍ മാതൃകയില്‍ ഇന്ത്യന്‍ സന്ന്യാസി ലീഗ് എന്നിവ കൊണ്ട് വരണം.
- സല്‍വാര്‍ കമ്മിസ് ഭാവിയില്‍ സന്യാസത്തിന്റെ ദേശീയ ചിഹ്നം ആയി മാറ്റാന്‍ രാഷ്‌ട്രപതി വിജ്ഞാപനം പുറപ്പെടുവിക്കണം.
- നൂറു രൂപ മുതല്‍ അയ്യായിരം രൂപ വരെ കൈക്കൂലി വാങ്ങുന്നവരെ ഗില്ലറ്റിനില്‍ ഇരുത്തുകയും അതില്‍ മുകളില്‍ വാങ്ങുന്നവര്‍ക്ക് നികുതി ഇളവു നല്‍കുകയും വേണം.
- എഴുപത്തി അഞ്ചു വയസ്സ് തികഞ്ഞു അഴിമതി കേസില്‍ പെട്ടു കോടതികള്‍ അബദ്ധത്തില്‍ ശിക്ഷിക്കുന്നവരെ ജയില്‍, തടവ്‌ തുടങ്ങിയ ശിക്ഷകളില്‍ നിന്നും ഇന്ത്യന്‍ പീനല്‍ കോഡില്‍ നിന്നും ഒഴിവാക്കി പദ്മശ്രീ പദവി നല്‍കി ആദരിക്കേണ്ടതും അവരുടെ ജീവിത കഥ ഒന്നാം ക്ലാസിലെ പാഠപുസ്തകത്തില്‍ ഉള്പ്പെടുത്താവുന്നതും ആണ് .
- ഒരു കോടിക്ക് മുകളിലുള്ള എല്ലാ അഴിമതി കേസുകള്‍ക്കും കോടതി ചെലവ് ഒഴിവാക്കണം.
നോട്ടീസില്‍ അടിക്കാന്‍ മുദ്രാവാക്യങ്ങള്‍ തികയാതെ വന്നാല്‍ അടിക്കുന്ന ദിവസത്തെ ഇന്ത്യവിഷന്‍ ഹെഡ് ലൈന്‍സ് കോപി ചെയ്യുകയോ മുല്ലപെരിയാര്‍, ചന്ദ്രയാന്‍,സാമ്രാജ്യത്വം, അധിനിവേശം തുടങ്ങിയ പദങ്ങള്‍ ഇടവിട്ടു പത്തു വരികള്‍ കൂടി ചേര്‍ക്കുകയോ ആവാം.
ഈ മുദ്രാവാക്യങ്ങളില്‍ ഉറച്ചു നിന്നു തന്നെ ഒത്തുതീര്‍പ്പ് വരെയും സമരം ചെയ്യുക എന്നതായിരിക്കണം ലക്‌ഷ്യം. സമരം നടക്കുമ്പോള്‍ കമ്പ്യുട്ടര്‍ അറിയാവുന്ന ഏതെങ്കിലും കോളേജ് പിള്ളേരെ പിടിച്ചു നിര്‍ത്തി ട്വിട്ടര്‍, ഫേസ്ബുക്ക്, ഗൂഗിളില്‍ ബസ്സ്‌ എന്നിവ വഴി നെഞ്ചത്തടിച്ചു നിലവിളിക്കേണ്ടതാണ്. സമര മൈതാനി മുഴുവന്‍ എയര്‍ കണ്ടീഷന്‍ ചെയ്യേണ്ടത് 'സഹന' സമരത്തിന്റെ പ്രധാന പരിപാടികളില്‍ ഒന്നാണ്.
സമരം തുടങ്ങുന്നതിനു മുന്‍പുതന്നെ ഒത്തുതീര്‍പ് കരാര്‍ എഴുതി നല്‍കേണ്ടതാണ്. അല്ലാത്ത പക്ഷം സമരം അനിശ്ചിത കാലത്തേക്ക് നീട്ടിവെക്കാം . ഒത്തു തീര്‍പ്പ് വ്യവസ്ഥകള്‍ മുന്നോട്ടു വെക്കാന്‍ ക്യാബിനറ്റ് റാങ്കില്‍ പെട്ട രണ്ട് മന്ത്രിമാരെങ്കിലും സമര പന്തലിനു പിറകില്‍ എത്തി നമ്മുടെ അരുമ ശിഷ്യന്മാരുമായി ചര്‍ച്ച നടത്തേണ്ടതാണ്.
സമരം അവസാനിക്കുന്നതിനോടനുബന്ധിച്ചു ഒത്തുതീപ്പു കമ്മറ്റി രൂപവല്‍ക്കരിക്കുകയും കായംകുളം കൊച്ചുണ്ണി, ഇത്തിക്കരപ്പക്കി തുടങ്ങിയ ആളുകളുടെ ഇപ്പോഴത്തെ തലമുറക്കാരെ കമ്മറ്റിയിലെ ഭാരവാഹികള്‍ ആക്കി പത്രസമ്മേളനം നടത്തണം. സ്വതന്ത്രസമരപെന്‍ഷന്‍ വാങ്ങുന്ന ഏതെങ്കിലും ഒരു തല നരച്ച ആള്‍ വേണം സമരം അവസാനിപ്പിച്ചു നാരങ്ങാ നീരു തരാന്‍. പിന്നെ ഗ്രുപ്പ് ഫോട്ടോക്ക് രണ്ട് മന്ത്രിമാര്‍, ഒരു കവി, മൂന്ന് ക്രിമിനല്‍ വക്കീലന്മാര്‍, ഒരു ബോളിവുഡ് നടന്‍ എന്നിവരെ നേരത്തെ ബുക്ക് ചെയ്യണം. പരിപാടി കഴിഞ്ഞാല്‍ ഐഡിയ സ്റ്റാര്‍ സിന്ഗര്‍ എന്ന പരിപാടിയില്‍ കര്‍ട്ടന്‍ വലിച്ച ഏതെങ്കിലും നാലു പേരെ വച്ച് ഒരു ഗാനമേള, പുനം പാണ്ടേ മുന്നോട്ടു വെച്ച സംസ്കാരിക പരിപാടി എന്നിവയും ആകാവുന്നതാണ് .
അങ്ങനെ വിട്ടാല്‍ പറ്റില്ലല്ലോ. ലോകത്തിലെ അഴിമതി മൊത്തം തുടച്ചു നീക്കിയിട്ടു തന്നെ കാര്യം!
സമര്‍പ്പണം: എന്റെ ജീവിതമാണ് എന്റെ സന്ദേശം എന്ന് തന്‍റെ ജീവിതം കൊണ്ട് നമുക്ക് കാണിച്ചു തന്ന മഹാത്മാവിന്റെ ഓര്‍മ്മകള്‍ക്ക് മുന്നില്‍, സൂര്യനസ്തമിക്കാത്ത സാമ്രാജ്യത്തെ സത്യാഗ്രഹം എന്ന സമരമുറ കൊണ്ട് മുട്ടുകുത്തിച്ച , തോക്കിനും ലാത്തിക്കും മുന്നില്‍ ത്യാഗത്തിന്റെ, സ്നേഹത്തിന്റെ, ആത്മാര്‍ഥതയുടെ, സഹനത്തിന്റെ സമരമാര്‍ഗ്ഗം കാണിച്ചു തന്ന നന്മയുടെ ആള്‍ രൂപത്തിന്റെ സ്മരണകള്‍ക്ക് മുന്നില്‍ ആദരവോടെ...
കലികാലത്തിന്റെ അഭിനവ പ്രഹസനങ്ങള്‍ക്ക് മുന്നില്‍ അവജ്ഞയോടെ...
